Kryeministri Edi Rama pas seancës së Kuvendit ka thënë se sot kemi mbushur një boshllëk të kodit tonë penal pasi ishte i vetmi Kod penal në Europë pa parashikuar një situatë ekonomie.
Në një dalje publike për mediat, Rama tha se vendi do të hyjë në një fazë të hapjes graduale dhe normalizimit pak nga pak të jetës.
“Është bërë një punë e mirë në funksion të situatës përtej të gjitha fjalëve kritikave, akuzave, ne sot kemi mbushur një boshllëk të kodit tonë penal pasi ishte i vetmi Kod penal në Europë pa parashikuar një situatë ekonomie. Do të hyjmë në një fazë të hapjes graduale dhe nomalizimit sa është e mundur të jetës. Ishte e pamundur pa këto masa për të garantuar hapjen. Një shqetësim i këtyre 10 ditëve është një lloj relaksimi dhe lëshimi që nuk mund të kthehet në fenomen sepse bëhet i rrezikshëm. Ne kemi rezultate të mira, pavarësisht humbjes së jetëve ne kemi bërë një punë të mirë. Ne duhet të mbrojmë jetën, kështu që në këtë aspekt mendoj se është bërë gjëja e duhur”, deklaroi Rama.
Rama komentoi edhe mbledhjen e djeshme të Këshillit të Sigurisë Kombëtare, të cilin e cilësoi të dobishëm, ndërsa veçoi bashkëpunimin me presidentin Ilir Meta. Ndalur tek komunikimi me kryedemokratin Lulzim Basha, Rama theksoi se pavarësisht qëndrimeve të kundërta vlen për t’u nënvizuar shkëmbimi cili duhet të bëhet shembull për situatat e tjera.
“Kemi pasur dje një takim të dobishëm të Këshillit të Sigurisë Kombëtare, kemi diskutuar edhe me presidentin, jemi harmonizuar përmes ekspertëve të presidentit, është arritur një përfundim që adreson edhe shqetësime të shprehura nga faktorë të tjerë. Kemi shkëmbyer opinione që nuk janë të njëjta edhe me Bashen. Nuk është e rëndësishme se sa biem dakord, por shkëmbimi. Unë mendoj se nëse toni dhe shkëmbimi do ishte njësoj si në mbledhjet e Këshillit të Sigurisë Kombëtare politika do ishte shumë më e besueshme”, u shpreh Rama./ abcnews.al
