Pas mbledhjes së Këshillit të Sigurimit Kombëtar për të diskutuar lidhur me çështjen “Balili”, Presidenti i Republikës Bujar Nishani theksoi se shqetësimi i ngritur është serioz.
Presidenti Nishani, theksoi rëndësinë dhe domosdoshmërinë e mbledhjes së sotme të Këshillit të Sigurimit Kombëtar, duke vlerësuar nismën e marrë nga Kryetari i Kuvendit të Shqipërisë Meta.
“Çështja ‘Balili’, përtej nivelit kombëtar i tejkalon përmasat individuale të rastit në fjalë, mbledhja e sotme u thirr pikërisht për të diskutuar, përcaktuar dhe këshilluar mbi hapat e marrë, ndjekjen dhe vijueshmërinë e veprimtarive institucionale të agjencive ligjzbatuese lidhur me hetimin e mëtejshëm të saj”, tha Nishani.
Kryetari i Kuvendit Ilir Meta argumentoi kërkesën drejtuar Presidentit të Republikës për të thirrur mbledhjen e Këshillit të Sigurimit Kombëtar me faktin se rasti konkret përbën jo vetëm një shqetësim të madh publik, por ai ka tërhequr edhe vëmendjen e aleatëve dhe partnerëve tanë strategjikë.
