Të paktën 6 000 persona janë arrestuar në të gjithë Turqinë në lidhje me grushtin e shtetit të dështuar.
Lajmin e bën me dije ministri turk i Drejtësisë, Bekir Bozdag.
Qeveria më parë tha se rreth 3,000 ushtarakë ishin arrestuar dhe mbrëmë një prokuror i lartë urdhëroi arrestimin e afro 2,750 gjyqtarëve të akuzuar për lidhje me klerikun mysliman Fetullah Gylen. Pretendimet nuk dihen sa të vërteta janë.
Gjithashtu këshilltari kryesor për çështje ushtarake i presidentit turk, Recep Tayyip Erdogan, Koloneli Ali Yazici është vënë në pranga nga policia turke.
Edhe për të ka dyshime të përfshirjes në grusht shtetin ushtarak. Lajmin e ka bërë të ditur CNN Turk.
“Procesi ligjor do të vazhdojë”, tha Bozdag për tv shtetëror turk.
“Ky do të jetë rasti më i gjerë parë ndonjëherë në historinë e Turqisë”, shtoi ai. Ai premtoi se ata që janë përfshirë në grushtin e shtetit të dështuar do të “paguajnë çmimin”.
Ministri i Drejtësisë përsëriti thirrjen e Presidentit Erdogan ndaj SHBA-së që të ekstradojnë Gylenin.
“Mbrojtja ndaj Gylenit do të dobësojë pozitën e SHBA-së dhe të dëmtojë reputacionin e saj,” tha ai. Nga i ashtuquajturi grusht shteti, 181 persona kanë mbetur të vrarë.
