Kryeministri i Edi Rama po zhvillon një konferencë të përbashkët me kryeministrin e Luksemburgut, Xavier Bettel. Bettel mbërriti sot në Tiranë, në kuadër të vizitës zyrtare që është duke zhvilluar në vendin tonë.
Gjatë fjalës së tij, Rama tha se Bettel ka qenë mbështetës i zëshëm i Shqipërisë në rrugën e integrimit evropian, ndërsa tha se sot mbushen 100 vite nga njohja e pavarësisë se Shqipërisë nga Luksemburgu.
“Ka qenë ndër mbështetësit më të zëshëm të Shqipërisë dhe MV për çeljen e negociatave. Dua ta falënderoj publikisht për faktin që në të gjitha rastet kryeministri ka qenë avokat i yni dhe kur ne nuk kemi qenë të pranishëm. E mbajti fjalën dhe më vjen jashtëzakonisht mirë se kjo vizitë përkon me një histori të veçantë, 100 vjet nga njohja që Luksemburgu i bëri shtetit shqiptar, nga 1922. Pas konferencës do të konsumojnë pak minuta për t’i treguar disa dokumente interesante. Tani ne jemi në procesin e negociatave. Kemi folur për konfliktin dhe ndajmë absolutisht të njëjtin qëndrim, për të mbështetur Ukrainën në luftën e saj të drejtë për çlirim. Kemi diskutuar edhe për marrëdhëniet bilaterale, Luksemburgu është si floriri, i vogël por peshën e ka të madhe. Ne këtu dëshirojmë interes dhe aktivitet nga kompanitë luksemburgeze, në vizitën në kthim do zhvillojmë një mbledhje me Dhomën e Tregtisë në Luksemburg. Luksemburgu ka treguar interes për vendet e Ballkanit dhe kompani të shumta janë vendosur në vendet fqinje. Duhet të thyejmë atë barrierën që i pengon të tjerët të vijnë në Shqipëri kur nuk kanë ardhur asnjëherë më parë. Luksemburgu ka një komunitet shqiptarësh. Dua ta mbyll këtë fjalë me një falenderim për kryeministrin e interesimin e tij të posaçëm për rajonin. Edhe në hyrje e thashë që Luksemburgu në tryezën e BE është një zë i rëndësishëm”, tha Rama.
