Ka mbërritur në atdhe trupi i deputetit të LSI-së për qarkun e Lezhës, Gjovalin Kadeli, i cili u nda nga jeta dy ditë më parë në Itali, ku po kurohej nga një sëmundje e rëndë.
Në portin e Durrësit, arkivoli u prit nga familjarë dhe të afërm të Kadelit, bashkëpunëtorë si dhe nga ish kreu i LSI, Ilir Meta, i cili vlerësoi kontributin e deputetit të ndjerë si një person me karakter të fortë dhe vlera të rralla.
Meta: Ishte njeri me besim te jeta dhe bënte shumë për shokët, njerëzit miqtë, megjithatë ne jemi këtu për ti shprehur mirënjohjen për gjitkçka që ai ka bërë dhe për ta kujtuar si një njeri me vlera të rralla.
Deputeti i LSI ndërroi jetën të premten. Ai la pas 4 fëmijë, ndërkohë qe edhe bashkëshortja ishte ndarë nga jeta dy vite më parë pas një sëmundje të rëndë.
Gjovalin Kadeli do varroset në fshatin e tij të lindjes, në Manati të Lezhës të hënën në mesditë.
