Teksa po pritet të vendoset për datën e mbajtjes së Konferencës së Parë Ndërqeveritare mes Shqipërisë e Maqedonisë së Veriut me BE-në, Ministri i Jashtëm kroat, Gordan Grlic Radman deklaroi këtë të martë në takimin e mbajtur në Luksemburg, se Maqedonia e Veriut dhe Shqipëria i kanë përmbushur kriteret për hapjen e negociatave.
“Maqedonia e Veriut dhe Shqipëria i kanë përmbushur të gjitha kriteret për t’i hapur negociatat për anëtarësim sa më shpejt që të jetë e mundur në Bashkimin Evropian dhe Kosova e meriton liberalizimin e vizave” tha ministri.
Para takimit të ministrave të jashtëm të vendeve anëtare të BE-së, theksohet se ende nuk ka marrëveshje për t’i hapur negociatat me Maqedoninë e Veriut për shkak të kundërshtimit të Bullgarisë.
Për Shqipërinë nuk ka pengesa, por siç raporton HRT e Kroacisë, disa vende nuk duan të ndajnë çështjen e hapjes së negociatave me Shqipërinë nga hapja e negociatave me Maqedoninë e Veriut.
Ministri Grlić Radman tha se Kosova duhet ta marrë liberalizimin e vizave sa më shpejt të jetë e mundur dhe se Kroacia e mbështet fuqimisht këtë.
“Kroacia do të donte të diskutonte statusin e kandidatit të Bosnjë dhe Hercegovinës sa më shpejt të jetë e mundur”, tha ndër tjerash Grlić Radman dhe theksoi edhe njëherë nevojën për ta ndryshuar ligjin zgjedhor në atë vend në mënyrë që të sigurohet barazia e tre popujve përbërës.
