Tre persona të maskuar dhe me një armë zjarri kanë grabitur një pikë karburanti gjatë natës në aksin rrugor Vlorë-Babicë.
Policia njofton se grabitja ndodhi mesnatën e 2 shtatorit rreth orës 02:30 minuta.
“Shërbimet e policisë kanë shkuar menjëherë në vendngjarje ku nga verifikimi paraprak ka rezultuar se tre shtetas të paidentifikuar kanë hyrë në karburant të maskuar dhe me një armë zjarri, ku kanë kërcënuar punonjësin e karburantit, shtetasin M.M., 60 vjeç, duke i marrë (vjedhur) një sasi lekësh prej 12.000 mijë lekë të reja dhe një aparat celular, dhe janë larguar” informoi sot në mëngjes policia e Vlorës.
Policia ka sekuestruar pamjet filmike në disa pika të ndryshme nga ku mund të kenë lëvizur autorët si dhe ka ngritur pika kontrolli dhe po vijon kontrolli i imtësishëm i zonës ku ka ndodhur ngjarja.
