Nxënësit duhet ti kthehen shkollës madje programi mësimor duhet zhvilluar i plotë dhe me masa strikte për frenimin e përhapjes së koronavirusit, por zbatimi i udhëzimit të miratuar nga Komiteti Teknik i Ekspertëve për Covid-19 është i vështirë dhe në shumë raste i pamundur për tu zbatuar në terrenin shqiptar.
Kështu mendon ish-drejtori i Arsimit Parauniveristar Fatmir Vejsiu sipas së cilit ai duhet të ishte produkt i specialistëve të Shëndetësisë, Arsimit dhe Financave.
“Në udhëzim nuk pashë asgjë, veç distancim social, mbrojtja nga Covid, penalitetet, hyrjet-daljet, pa marrë parasysh përmasat dhe kushtet e të gjithë shkollave të vendit. Shumë gjëra që teorikisht janë të domosdoshme, uji i nxehtë, klorifikimi, larja e duarve, të gjitha janë me kosto. I kanë shkollat këto? Unë e di që si kanë, në qytet dhe jo më në fshat.”
Veç sigurimit të kushteve higjeno-sanitare shkollat duhet të kenë dyfishin e mësuesve të një situatë normale. Specialisti i Arsimit argumenton mendimin e tij e duke marrë shembull Tiranën.
“Tirana vetë ka 70 shkolla me 40 klasa secila. Do 1.5 mësues secila klasë, i bie 60 mësues çdo shkollë. Po të bësh ndarjen, duhen minimalisht dyfishi i mësuesve që punojnë aktualisht në sistem. I bie të shtohen 4200 paga ose mësues, përdor termin paga ose mësues sepse kushdo që mendon se mësuesit që janë mund të bëjnë dyfishin e ngarkesës e kanë gabim, pasi mësuesit nuk i bën dot fizikisht dhe profesionalisht”.
Që masat anti-covid të zbatohen ish-drejtori i arsimit parauniversitar i sugjeron ministrisë së Arsimit që shumë kompetenca ti lërë në dorë të shkollave. Veç kësaj Vejsiu thotë se bashkëpunimi i prindërve është i domosdoshëm.
“Kuptohet që në këto situata ka shkolla që i kanë të gjitha kushtet, të gjitha mundësitë. Shansi i atyre fëmijëve që ndodhen në një shkollë me këto kushte dhe fati i keq i atyre që ndodhen në shkolla të vogla, periferike, me një klasë që do të ndahet në dyshë me një mësues që do të bëjë dy norma. Prindërit mos të mendojë se shteti duhet ti mbulojë të gjitha, është e pamundur. Prindërit duhet të pajisë fëmijën me maskë dhe dezinfektant”.
Megjithkëtë Vejsiu mendon se udhëzimi i Komitetit Teknik të Ekspertëve duhet të kishte parashikuar gjithashtu skenarë të ndryshëm në varësi të ecurisë së pandemisë së koronavirusit dhe efekteve që mund të shfaqë infeksioni në sistemin arsimor./abcnews.al
