Nga Elton Qyno
Vajza e mitur S.Mjeshtri, për të cilën u vranë 3 persona në Klos, përfshirë këtu dhe babain e saj, Fiqiri Mjeshtri, ka deklaruar në polici marrëdhënien që ajo kishte me dy djemtë e përfshirë në ngjarjen kriminale, Kenado Shira dhe Renato Hasula. Sipas deklarimit të saj, ajo nuk ka pasur asnjë foto dhe video nudo me dy të rinjtë. Por ka pretenduar se shantazhohej në mënyrë të vazhdueshme prej dy të rinjve. Ky shantazh sipas saj, është bërë edhe përmes hapjes së thashethemeve mes shokëve dhe shoqeve të klasës, duke sjellë për një moment mbyllje në banesë dhe refuzim për të shkuar në shkollë.
E mitura ka rrëfyer para psikologes së shkollës dhe policisë, se dyshonte që dy të rinjtë, mund të kishin foto të saj në plazh, të cilat ajo i kishte publikuar në instagram. Por në asnjë moment s’ka menduar dhe besuar se Kenado Shira dhe Renato Hasula, kishin foto nudo. E mitura pasi ka dhënë dëshminë në polici dhe ka marë pjesë në ceremoninë e varrimit të babait të saj, mësohet të jetë larguar nga zona e Klosit. Policia dhe prokuroria e Matit, tashmë nuk kanë asnjë person të akuzuar për këtë ngjarje të rëndë, ku mbetën të vrarë tre persona dhe dy të tjerë u plagosën.
Autori i këtij krimi, Fiqiri Mjeshtri, vetëm pak minuta pas shkaktimit të masakrës, vrau veten në dalje të qytetit të Klosit. Biseda e fundit e tij ishte me vëllain, Besnik Mjeshtrin, të cilit i kërkoi ti kishte amanet fëmijët. Aktualisht hetimet, janë përqëndruar tek ekspertimi i aparateve celulare të protagonistëve të kësaj ngjarje, me shpresën e zbardhjes së bisedave telefonike që kanë kryer të rinjtë por edhe prindërit e tyre. Kjo ngjarje e rëndë sipas grupit hetimor do shkojë drejt mbylljes pasi, autori i këtij krimit vrau veten.
Pas një takimi për s’qarimin e situatës, Fiqiri Mjeshtri, ekzekutoi babë e bir, Kenado dhe Liri Shira. Ndërsa të plagosur mbetën dy minorenë të tjerë, Eglantin dhe Renato Hasula. Ngjarja e rëndë tronditi opinionin publik, ndërsa shkak i kësaj vrasje ishin ngacmimet e vajzës nga dy djemtë. Babai i vajzës,Fiqiriu, në takimin për sqarim ka kërkuar që Kenado Shira ta merte për grua vajzën e tij, pasi në të kundërt e priste plumbi. Kenado ka kundërshtuar ultimatumin e babait të S.Mjeshtrit, duke u larguar nga tavolina e lokalit. Por ai e ka ndjekur duke e qëlluar në disa herë, duke e lënë të vdekur në vend.
