Presidenti Ilir Meta e ka nisur konferencën e tij me marrëveshjen e 17 majit të vitit 2017 të nënshkruar midis kryeministrit Edi Rama dhe ish kreut të PD, Lulzim Basha.
Duke e konsideruar si ditën më të errët të pluralizmit politik, Meta tha se ajo ishte një marrëveshje e turpshme kundër zgjedhjeve të lira dhe të ndershme.
“17 Maji ka qenë dita më e errët e pluralizmit politik. Ajo marrëveshje e turpshme dhe tinzare e realizuar në errësirë të plotë 5 vite më parë, është mesë e qartë që ishte një marrëveshje kundër zgjedhjeve të lira dhe të ndershme, duke penalizuar dhe aleatët që qëndruan për muaj të tërë solidarë në çadër. Jo vetëm kaq, ajo vijoi për gjatë 5 viteve dhe ende vijon”, tha Meta.
17 Maji i vitit 2017 është data që hyri në historinë e politikës shqiptare. Takimi Rama-Basha erdhi pasi Basha qëndroi në 90 ditë në çadrën e hapur para kryeministrisë duke kërkuar me këmbëngulje krijimin e një qeverie tranzitore që të garantonte zgjedhje të lira e të ndershme. Por gjithçka përfundoi me atë marrëveshje që e futi PD-në në një bashkëqeverisje për disa muaj me socialistët, por sërish nuk arriti të fitonte.
