Kriza politike në Maqedoni ende nuk po tejkalohet. Zgjedhja e kreut të ri të Parlamentit është kthyer në prioritetin e partive përbërëse të shumicës parlamentare në Maqedoni.
Kryetari i LR-PDSH, Ziadin Sela shprehet se nëse Presidenti Ivanov vazhdon ta shkelë Kushtetutën dhe të mos japë mandatin, shumica parlamentare ka të drejtën të votojë qeverinë e re.
Gazeta gjermane “Die Tagespost” shkruan se Maqedonia, krahas krizës qeveritare, tani ka hyrë dhe në krizë kushtetuese, ndërsa nuk sheh ndonjë zgjidhje të afërt në horizont. Ambasadori amerikan në Shkup, Xhes Bejli bëri një tjetër ndërhyrje për kapërcimin e ngërçit politik.
“Është e rëndësishme që institucionet demokratike të funksionojnë dhe pikërisht aty qëndron zgjidhja”, u shpreh shefi i misionit diplomatik amerikan.
Ndërsa këtë javë Shkupin do ta vizitojë edhe një herë komisioneri për zgjerimin Johanes Hahn.
