Ministri i Drejtësisë: Ligjërimi politik se Vetting ndreq vendimmarrjen e gjykatave është më i gabuari i mundshëm
“Vettingu nuk është hakmarrje politike as nuk ndreq vendimarrjen në gjykata”, Ky është mesazhi që përcjell ministri i drejtësisë, Ylli Manjani, pikërisht në ditën kur kanë hyrë në fuqi ndryshimet kushtetuese. Por këto ndryshime janë ende të paaplikueshme pasi nuk janë miratuar shtatë ligjet e reformës në drejtësi të cilat bëjnë funskionale kushtetutën e re.
Përmes një mesazhi në facebook, ministri i drejtësisë, shprehet se ky ligjerim politik se vetingu zgjidh vendimarrjen e gjykatave, është më i gabuari i mundshëm.
Reagimi i ministrit të drejtësisë vjen pikërisht në ditën kur ka hyrë në fuqi kushtetuta e re e miratuar më 21 korrik. Por ajo që e mban peng funksionimin e ndryshimeve kushtetutëse janë shtatë ligjet orghnaike të cilat ende nuk janë miratuar nga Kuvendi. Sipas ndryshimeve në kushtetutë, institucioni i parë që duhet të ngrihet 5 ditë pas hyrjes në fuqi të ndryshimeve, është Këshilli i Emërimeve në Drejtësi, pra brenda datës 16 gusht. Por presidenti nuk mund ta ushtrojë këtë kompetencë, pasi ligji i vlerësimit të gjytarëve nga ku do të zgjidhen anëtarët e KED, ende nuk është miratuar.
Shtatë ligjet e reformës në drejtësi, e mbajën peng të gjithë aplikimin e ndryshimeve në kushtetutë. 11 gushti ishte diskutuar si dita kur do të mund të mblidhej parlamenti për të miratuar shtatë ligjet e reformës në drejtësi. Por me sa duket ende nuk ka një dakortësi mes palëve për t’i dhënë fund këtij procesi të reformës në drejtësi.
