Presidenti GJEDNJ: Harmonizoni të drejtën e pronës me interesin publik
Ministri i Drejtësisë Ylli Manjani dhe ai i Financave, Arben Ahmetaj i kanë kërkuar Presidentit të Gjykatës Europiane të të Drejtave të Njeriut Guido Raimondi, pezullimin e shqyrtimit të çështjeve të pronës që janë në pritje në këtë gjykatë. Kërkesa është bërë gjatë një takimi që dy ministrat kanë patur në Strasburg, ku dhe kanë informuar për ligjin e ri për trajtimin e pronës. Ministri Manjani e ka argumentuar kërkesën e tij me faktin se “tashmë ka një Ligj që ofron mekanizmin e munguar për trajtimin e çështjes së pronës në Shqipëri”. Ndërkohë ministri i financave Ahmetaj në mbështetje të kërkesës për pezullimin e çështjeve të pronës, ka deklaruar që “Për 10 vitet e aplikimit të Ligjit, në buxhetin e shtetit do të ketë një zë me vete, ku do të alokohen fondet për këtë çështje”.
Por ajo që ka ofruar Presidenti i Gjykatës Evropiane të të Drejtave të Njeriut ka qenë vetëm kërkesa “që të ketë harmoni ndërmjet respektimit të të drejtës së pronës me interesin publik të atyre që paguajnë”.
Ndërkohë i pranishëm në takim gjyqtari shqiptar Ledi Bianku ka kërkuar që si pjesë e reformës në drejtësi të merren në konsideratë disa aspekte, të cilat janë konstatuar nga GJEDNJ në vendime të ndryshme të dhëna për Shqipërinë.
Një takim të ngjashëm me Presidentit e Gjykatës Europiane të të Drejtave të Njeriut, Raimondi, ka patur javë më parë edhe Presidenti i Republikës, Bujar Nishani. Krei i Shtetit jo vetëm që nuk e ka firmosur ligjin e ri të pronës por përkundrazi e ka dërguar atë në Gjykatën Kushtetuese, me argumentin se ligji shkel të drejtat e pronarëve.
