Ministri i Drejtësisë, Ylli Manjani ka konfirmuar deklaratën e përfaqësuesit të PD-së, Oerd Bylykbashi mbrëmjen e sotme se palët kishin rënë dakord për mënyrën se si do të votohej në të gjitha institucionet e drejtësisë. Sipas Manjanit, në mbledhjen e së hënës kishte pyetur për këtë çështje dhe si negociatori Bylykbashi ashtu edhe negociatori socialist Agaçi, kishin konfirmuar se ishte gjetur zgjidhja.
“Ky grup negociator u krijua nga tryeza e partive politike dhe jo nga komisioni i posaçëm parlamentar. Që do të thotë nëse do të kishte një raport, ai do t’i jepej kryetarëve partive dhe jo komisionit. Së dyti, kemi diskutuar ditën e hënë për çështjet që kishin mbetur pezull, e cila kishte të bënte me rolin e vëzhguesve ndërkombëtar në organin e vetingut.
Çështjet e tjera presupozoheshin të zgjidhura. Unë e konfirmoj atë që tha më parë, zoti Bylykbashi. Kam qenë unë që e hapa këtë çështje për të kuptuar se si ishte rënë dakord pasi kanë qenë negociata dypalëshe, PD dhe PS. Zoti Agaçi dhe Bylykbashi thanë të dy: po jemi marrë vesh për këtë histori. Ne mund ta përfshinim në protokollin e mbledhjes, por për shkak se ajo mbledhje u ndërpre krejt papritur, ne nuk kishim si ta përfshinim. Në atë mbledhje mbetën dy çështje, të cilat u plotësuan sot me propozimin e zotit Hahn dhe mendoj që bashkë me letrën e zotit Hahn, çështja quhej e mbyllur. Unë po pres që negociatorët të mblidhen dhe nuk pres ndonjë reagim“, tha Manjani, i cili përfaqësoi LSI-në si ekspert në negociata me Engjëll Agaçin e PS-së dhe Oerd Bylykbashin e PD-së.
