Policia e Mallakastrës ka arrestuar për kultivim lëndësh narkotike inspektorin e Policisë Pyjore në Bashkinë Ballsh dhe kryetarin e fshatit Drenovë.
Në bazë të Plan-Veprimit për parandalimin e veprimtarisë së kultivimit të bimëve narkotike, gjatë kontrollit të territorit në vendin e quajtur “Bregu i Gushës” në një parcelë në pyll shërbimet e policisë gjetën të kultivuara 80 bimë narkotike të dyshuara Cannabis Sattiva.
Policia arrestoi në flagrancë autorin e kultivimit, shtetasin Meçan Mustaj, 49 vjeç, me detyrë Inspektor i Policisë Pyjore në Bashkinë Ballsh.
Gjithashtu u bë arrestimi në flagrancë i kryetarit të fshatit Drenovë, shtetasit Niko Nure, 41 vjeç.
Materialet i kaluan Prokurorisë pranë Gjykatës së Shkallës së Parë Fier për veprat penale “Kultivimi i bimëve narkotike” dhe “Shpërdorimi i detyrës” në ngarkim të shtetasit Meçan Mustaj dhe për veprën penale “Moskallëzim i krimit” në ngarkim të shtetasit Niko Nure.
