Një automjet, tip ‘Citroen’ me targa AB 682 DN, ka humbur kontrollin dhe ka dalë nga rruga duke rënë në kanal në hyrje të fshatit Drobonik në Berat. Mësohet se mjeti ka rrëshqitur dhe ka dalë nga rruga për shkak të shpejtësisë së madhe dhe kthesës së vështirë të rrugës.
Sipas policisë, automjeti rezulton se është në pronësi të një gruaje nga fshati Bardhaj, ndërkohë që në automjet udhëtonte një djalë, identiteti i të cilit nuk dihet ende pasi drejtuesi i mjetit ka dalë nga makina dhe është larguar nga vendngjarja. Gjithashtu mësohet se edhe në Spitalin Rajonal të Beratit nuk është paraqitur për mjekim asnjë person.
Në vendngjarje kanë shkuar forca të shumta policie, që po kryejnë edhe këqyrjen e vendit të aksidentit për të zbardhur shkaqet dhe dinamikën e tij. Dyshimet e para të policisë janë se drejtuesi i mjetit mund të ketë qenë pa patentë, adoleshent ose i dehur.
Të gjitha këto dyshime lidhen me faktin se drejtuesi i mjetit është larguar menjëherë pas aksidentit, ndërkohë që policia është duke u përpjekur të gjejë pronaren e mjetit për të dëshmuar se kujt ja kishte lënë makinën.
