Një makinë e vjedhur në Tiranë në orët e para të mëngjesit të sotëm, ka udhëtuar drejt Bulqizës, ku hajdutët janë ndjekur nga policia dhe gjatë ndjekjes tamam si nëpër filma, ka pasur të shtëna me armë zjarri.
Rreth orës 07.42, policia e Dibrës thotë se, ka marrë informacion se në Tiranë një automjet është vjedhur dhe po lëviz në drejtim të Bulqizës.
Menjëherë është organizuar puna ku shërbime të policisë kanë ngritur një pikë kontrolli në Qafën e Buallit me qëllim ndaljen e këtij automjeti.
Në momentin që është afruar makina tip ‘Benz’ me targa AA 186 EE, nga shërbimet e policisë i është bërë shenjë ndalimi, por automjeti është larguar me shpejtësi duke rrezikuar edhe jetën e punonjësve të policisë.
Ndodhur në këto kushte policia ka qëlluar në ajër me qëllim që automjeti të ndalej.
Shërbimet e policisë kanë vijuar ndjekjen e automjetit ku në hyrje të qytetit të Bulqizës, dy persona ende të paidentifikuar kanë braktisur automjetin duke u larguar me shpejtësi në këmbë.
Aktualisht Policia e Bulqizës vijon krehjen e zonës për identifikimin dhe kapjen e personave si dhe vijojnë hetimet për sqarimin dhe dokumentimin e plotë të kësaj ngjarje.
