Pas informacioneve të shkëmbyera me homologët grekë dhe malazezë policia kufitare e Sarandës ka bllokuar një mjet lundrues turistik, i cili rezultonte i vjedhur në Turqi.
Mësohet se në bordin e mjetit të quajtur “LIBERTAS” ndodheshin tre shtetas, një turk dhe dy rusë, të cilët vinin nga Korfuzi.
Njoftimi i Policisë:
Policia Kufitare e Sarandës bllokon një mjet lundrues turistik dhe vë në pranga kapitenin e këtij mjeti.
Nga shkëmbimi në kohë reale i informacionit me homologët dhe nga verifikimet me Interpolin, rezultoi se mjeti turistik “LIBERTAS” ishte vjedhur në Turqi.
Mjeti turistik “LIBERTAS” me 3 shtetas ne bord (1 turk dhe 2 rusë) i cili vinte nga Korfuzi, ka hyrë në territorin shqiptar nëpërmjet portit të Sarandës.
Nga punonjësit e Policisë Kufitare gjatë përpunimit të dokumentacionit nisur edhe nga përbërja e ekuipazhit, u dyshua se ky mjet ishte i vjedhur.
Për këtë arsye punonjësit e Policisë Kufitare të Sarandës kanë shkëmbyer informacion me homologët grekë dhe malazezë dhe pas verifikimeve të kryera edhe nga Interpol Tirana, rezultoi se këtë mjet, këta shtetas ia kishin vjedhur një shtetaseje turke.
Në përfundim të veprimeve të kryera nga Policia Kufitare në bashkëpunim me Policinë vendore të Sarandës dhe me Prokurorinë , shtetasi D. U, 47 vjeç nga Turqia, u ndalua për veprën penale “Trafikimi i mjeteve motorike”.
U njoftua Policia turke për të kontaktuar me pronaren e mjetit lundrues, për veprime të mëtejshme.
