Në orën 10:30 Lëvizja Socialiste për Integrim mblodhi Kryesinë. Fokusi kryesor i diskutimeve është reforma në drejtësi, pa lënë mënjanë dhe atë zgjedhore.
Meta theksoi se forca që ai drejton është e gatshme të votojë çdo draft PD-PS për reformën në drejtësi, mjafton që të ketë konsensusin e të dyja palëve.
“LSI besoj se ka qenë forca politike më koherente në të gjithë këtë proces që nga fillimi. Jo vetëm është domosdoshmëri reforma në drejtësi por është e vonuar. LSI është e gatshme të votojë çdo reformë PS-PD mjaft që te jetë me konsensus. Për më shumë detaje me mediat do të komunikojmë pasi të diskutojmë për zhvillimet e fundit.”– deklaroi Meta.
Sa i takon vendeve të rezervuara Meta përgjigjet: “Jam i habitur dhe i çuditur që kjo çështje nuk është zgjidhur më përpara. Kërkoj të zgjidhet me urgjencë dhe koherencë . Shqipëria nuk e ka luksin të miratojë reformën në drejtësi pa opozitën nëse opozita vërtet është e sinqertë në dhënien e konsensusit të saj dhe kërkon që këto garanci substanciale të mos cënojnë besueshmërinë e institucioneve të reja
Meta përsëriti gjithashtu dhe qëndrimin e LSI-së: LSI ka deklaruar se do të votojë sipas standardeve të saj dhe nëse do të dështonte konsensusi me opozitën nëse do dështonte me përgjegjësi të kësaj të fundit”
Një ditë më parë, mazhoranca qeverisëse diskutoi mes vetes në lidhje me pikat kyçe të reformës në drejtësi, pikërisht ato që janë edhe ngërçi mes saj dhe opozitës. Kryetari i Kuvendit, Ilir Meta, shoqëruar edhe nga ministri i Drejtësisë,Ylli Manjani, kreu i grupit parlamentar të LSI- së, Petrit Vasili si dhe shefi i kabinetit, Sokol Dervishaj, shkoi herët në mëngjes në zyrën e kryeministrit Edi Rama. Në takim mësohet se kanë qenë të pranishëm edhe ministri i Brendshëm, Saimir Tahiri dhe ministri i Punëve të Jashtme, Ditmir Bushati. Takimi erdhi një ditë pasi kreu i Kuvendit, Ilir Meta bisedoi me kreun e opozitës, Lulzim Basha.
Epiqendra e gjithë diskutimeve mes vetë përfaqësuesve të mazhorancës ka qenë pikërisht gjetja e formulës së kompromisit me opozitën, në mënyrë që të mos ketë më vonesa apo pengesa për votimin e reformës. Pas një orë e gjysmë bisede, bashkëkryetarët e mazhorancës janë ndarë, ndërkohë që në publik doli edhe varianti i fundit, ku mazhoranca duket se ka lëshuar “pe” për opozitën dhe që pritet të kalojë sot në Komisionin e Posaçëm të Reformës në Drejtësi.
