Portieri Hugo Lloris, ka njoftuar ditën e sotme tërheqjen nga kombëtarja e Francës. Lojtari ka mbajtur shiritin e kapitenit te kombëtarja franceze, me të cilët fitoi edhe Botërorin në Rusi në vitin 2018.
Loris e ka nisur karrierën e tij në radhët e përfaqësueses së Francës në vitin 2008 dhe që atëherë ka koleksionuar 145 ndeshje me fanellën e bluve. Me Francën ai ka fituar Botërorin 2018 dhe Ligën e Kombeve 2021, ndërsa ishte finalist në Euro 2016 dhe Botërorin 2022.
Tërheqjen e ka bërë të ditur vetë lojtari, në një intervistë të dhënë së fundmi.
“Vjen një moment kur duhet të dish të kalosh stafetën. Nuk dua që të mbaj peng diçka, e kam thënë dhe e kam përsëritur që Franca nuk është e askujt dhe të gjithë kemi mënyrën që të verifikojmë se është kështu. Unë i pari mendoj se skuadra është gati të riniset nga një emër i ri mbrapa dhe është një portier tjetër i gatshëm”, tha ai.
