Pas një periudhe të shkurtër pushimi, ka rinisur në Komisionin Hetimor marrja në pyetje e dëshmitarëve për çështjen e inceneratorëve, ku ka dhënë dëshminë e tij dhe kryebashkiaku i Elbasanit, Gentian Llatja.
Ndonëse, Llatja nuk ka pasur rol vendimmarrës, në kohën kur kanë nisur procedurat për inceneratorin e Elbasanit, tha se në këtë qytet ka pasur një emergjencë mjedisore.
Llatja u pyet në lidhje me kërkesën e Qazim Sejdinit, për ndërtimin e inceneratorit, se pse ishte parashikuar që në fillim, që detajet e kontratës të ishin të ngjashme me ato të dorëzuara më pas nga kompania e Klodian Zotos.
Sipas deputetëve të opozitës kompetencën për shpalljen e emergjencës mjedisore nuk e ka Këshilli Bashkiak, me të cilin Qazim Sejdini ka kërkuar që të ndajë një pjesë të përgjegjësisë.
Sipas Luçiano Boçit, në fillim projekti ishte që në Elbasan të ngrihej një lanfill, që do të kushtonte rreth 2 milionë euro, dhe me kërkesë të Sejdinit dhe miratim nga qeveria qendrore, u ra dakord për projektin 22 milionë eurosh, që u pagua nga taksapaguesit shqiptarë.
Debatet në Komision:
Boçi: Ju përmendet që ka një korrespodencë, e para ndërtimi i një landfilli, dhe papritur më pas u shfaq inceneratori. Landfilli do të kushtonte rreth 2 milionë euro, në terma të përgjithshëm, u zgjodh papritur projekti që zotërohej nga Zoto, dhe ne disbursuam si shtet 22 milionë euro. Pse nuk u zgjodh varianti i landfillit?
Llatja: Pse u zgjodh impianti i trajtimit të mbetjeve, se ka pasur një studim fizibiliteti, ka pasur një vendim për përcaktimin e vendit, në dijeninë time, ai projekt ka qenë në një vend, që sot nxirrën minerale, dhe ka një vlerë ekonomike sot atje. Bashkia e Elbasanit në 2008 ka miratuar, në kushtet e emergjencës, një studim qeverisë së drejtuar nga zoti Berisha, pasi djegiet digjeshin në natyrë. Kanë qenë 3 vende, të përshtatshme për venddepozitime të ndërtimit të impiantit.
Boçi: Në vitin 2008 kush ishte kryetar Bashkie?
Llatja: Ka qenë zoti Qazim Sejdini
Boçi: Propozimi ka qenë për landfill apo incenerator?
Llatja: Venddepozitim i mbetjeve
Tabaku: Pse ka ndryshuar nga landfill në 2014, brenda të njëjtit vit, në incenerator?
Llatja: Zoti Sejdini ka kërkuar zgjidhjen e situatës, se harrohet shpejt ajo që është bërë. Këshilli Bashkiak ka marrë një vendim, dhe për cilindo kryebashkiak është i detyrueshëm.
