Prokurori i Përgjithshëm, Adriatik Llalla, po zhvillon takime në Bruksel në kuadër të vizitës së tij zyrtare.
Llalla është pritur nga drejtori i Përgjithshëm i Zyrës Europiane e Anti-Mashtrimit (OLAF), Giovanni Kessler të Komisionit Europian, ku ka diskutuar lidhur me forcimin e bashkëpunimit në luftën kundër korrupsionit.
Për Prokurorin e Përgjithshëm, lufta kundër korrupsionit është një prej prioriteteve madhore të Shqipërisë për integrimin në Bashkimin Europian.
“Për këtë arsye përvoja e autoriteteve të Brukselit në këtë drejtim do të shërbejë për forcimin e mekanizmave hetimorë”, tha Llalla.
Kjo është vizita e parë zyrtare e kryeprokurorit jashtë vendit, pas përplasjeve me deklarata me ambasadorin amerikan Donald Lu, i cili tha se Llalla është kundër reformës në drejtësi, duke sjellë reagimin e Prokurorisë ndaj ambasadorit, të cilin e akuzuan për shantazh.
