Ambasadori britanik: “Dayli Mirror” nuk kanë kërkuar informacione nga ambasada jonë apo nga autoritete të tjera britanike, iu referua disa komentuesve maqedonas
Prokurori i përgjithshëm Adriatik Llalla dhe ambasadori britanik në Shqipëri, Nicholas Cannon rrëzuan pretendimet e medias britanike “Dayli Mirror” sipas së cilës narkotrafikantët në Shqipëri janë të lidhur me grupet ekstremiste fetare. Prokurori i Përgjithshëm theksoi se bazuar në raporte të institucioneve ligjore, nuk rezulton të ketë elementë kriminal të lidhur me grupet ekstremiste. Llalla i cilëson publikimet e ditëve të fundit në disa media ndërkombëtare, hamendësime periferike të medias.
“Këto nuk janë materiale të shërbimeve sekrete të shteteve europiane, por këto që përmendëm edhe pak ditë me parë nga Gjirokastra. Kjo është një hamëndje mediatike e disa mediave periferike vedase. Në Shqipëri nuk ka në asnjë mënyrë, element terrorist ose që prodhimi i kanabisit të përdoret për qëllime terroriste. Hetimet që ka kryer prokuroria në të gjithë territorin e vendit, ne ato vende ku paraprakisht ky material pra kanabisi, kultivohej me shumicë por që tashmë zona është krejtsisht e pastër, nuk ka rezoltuar me asnje rast që kanabisi të jetë i lidhur me terrorizmin. Ashtu siç është dhe në zonën e Dukagjinit, ku ka një kultivim të dukshëm të kësaj lënde narkotike dhe ku insitucionet shtetërore, prokuroria, policia e shtetit, qytetarët po bashkëpunojnë për ndërprerjen e këtij fenomeni dhe në zonën e Dukagjinit”, tha Llalla.
Për të njëjtën çështje ambasadori britanik sqaron se gazetarët e “Dayli Mirror” nuk kanë kërkuar informacion për këtë çështje në ambasadë dhe se po ta kishin kërkuar përgjigja do të ishte:
“Gazetarët që përgatitën artikullin e “Daily Mirror” nuk kanë kërkuar informacione nga ambasada jonë apo nga autoritete të tjera britanike. Nëse do të na kishin pyetur, do t’u kishim thënë se ne nuk dimë të ketë një lidhje ndërmjet trafikimit të narkotikëve dhe ekstremizmit fetar këtu në Shqipëri. Sigurisht, ne nuk kemi monopol mbi informacionin, por shumë prej të dhënave në artikull dukej se i referoheshin komentuesve maqedonas. Nuk jam i sigurt nëse këto burime kanë tagrin e duhur për të komentuar mbi këto çështje në Shqipëri në mënyrë të saktë. Jam në dijeni të reagimeve të Ministrit Tahiri dhe Drejtorit të Policisë Çako, të cilët i kanë përgënjeshtruar këto thënie dhe deklaratat e ngjashme në shtypin italian në mënyrë të vendosur. Shqipëria është një vend i vështirë dhe nuk është e lehtë për gazetarët të fluturojnë nga Londra dhe të kuptojnë gjithçka në dy ditë. Mendoj se kjo ka qenë ajo çka ndodhur në këtë rast”, tha Cannon.
