Me 74 vota pro, Kuvendi i Shqipërisë ka miratuar dje projektligjin “Për parandalimin dhe luftimin e infeksioneve e sëmundjeve infektive”. I pari ligj në vendin tonë në fushën e shëndetësisë që synon parandalimin dhe kontrollin e sëmundjeve ngjitëse. Teksa bën të detyrueshëm raportimin në ISHP të institucioneve shtetërore dhe private, në rast të infeksioneve apo sëmundjeve infektive, ky ligj nuk përcakton asnjë fond shtesë. Po kështu, në rast epidemish do të jetë Ministria e Shëndetësisë përmes fondit të posaçëm, që do të alokohet për rastet në nevojë.
Ligji
Konkretisht, përmes këtij ligji synohet marrja masave për parandalimin, kontrollin, trajtimin dhe monitorimin e sëmundjeve infektive në vend. Po kështu, përcakton detyrat ndaj çdo institucioni publik apo jopublik, raportimin në mënyrë të detyrueshme tek Instituti i Shëndetit Publik për çdo infeksion apo sëmundje të dyshuar apo të konfirmuar, sipas listës së sëmundjeve infektive dhe udhëzuesit përkatës kombëtar, të miratuar nga Ministria e Shëndetësisë.
Alarmet
Gjithashtu, me këtë ligj detyrohet ngritja e një mekanizmi të grumbullimit të të dhënave për dërgimin, marrjen, vlerësimin dhe grumbullimin e alarmeve mbi ndodhi, të cilat mund të kenë apo kanë impakt mbi shëndetin publik dhe, më tej, bën të mundur shpërndarjen e këtij informacioni në një kohë sa më të shpejtë për të gjithë ata që kanë akses në të apo në struktura të ndryshme të qeverisjes, si dhe ndihmon në koordinimin e përgjigjes kombëtare.
Refugjatët
Një nen i veçantë në këtë ligj, neni 27, cilëson rastet kur ka emergjenca të bazuara në fakte dhe të justifikuara, të lidhura me gjendjen e rëndë apo kërcënime të reja serioze ndërkufitare për shëndetin apo përhapjen e shpejtë të infeksionit midis vendeve, ministria përgjegjëse për shëndetësinë, sipas propozimit të Institutit të Shëndetit Publik, duhet të adaptojë masa të shpejta, të menjëhershme, të cilat koordinohen më tej me OBSH-në dhe vendet ndërkufitare e ato të Bashkimit Evropian. Kur kërcënimet serioze ndërkufitare për shëndetin i tejkalojnë kapacitetet kombëtare, pas vlerësimit nga ministria përgjegjëse për shëndetësinë, në bazë të një protokolli të miratuar me vendim të Këshillit të Ministrave, ministria përgjegjëse për shëndetësinë mund të kërkojë mbështetjen nga OBSH-ja, vendet ndërkufitare, ato të Bashkimit Evropian dhe Komisioni Evropian, nëpërmjet mekanizmave të përcaktuara prej tyre. Ministria përgjegjëse për shëndetësinë adapton procedurat e përgatitura nga Instituti i Shëndetit Publik mbi zbatimin e shkëmbimit të informacionit, konsultimin dhe koordinimin.
Të dhënat personale
Një nen i rëndësishëm është dhe ai që trajton mënyrën e shkëmbimit të të dhënave personale. Të dhënat personale, të cilat janë të nevojshme për gjurmimin e kontakteve, i nevojiten Institutit të Shëndetit Publik, Shërbimit Kombëtar të Inteligjencës Epidemike dhe autoriteteve të tjera kompetente të shëndetit publik, të cilat zbatojnë gjurmimin e kontakteve, dhe u transmetohen vetëm atyre apo autoriteteve përkatëse të vendeve të përfshira në gjurmimin e kontakteve, nëpërmjet sistemit përkatës. Mesazhet që përmbajnë të dhëna personale duhet që në mënyrë automatike, të fshihen pas 12 muajve nga data e postimit të tyre. Shkëmbimi i alarmeve përkatëse kryhet nëpërmjet sistemit përkatës të njoftimit të hershëm dhe të shpejtë./Mapo/
