Të ardhurat nga biznesi për të vetëpunësuarit dhe individët tregtarë do të tatohen në masën 15%.
Ky është një ndër propozimet që po shqyrtojnë Financat i cili nuk ishte përcaktuar në draftin fillestar të ligjit për të ardhurat personale që pritet të bëhet publik në ditët në vijim.
Profesionistët e lirë janë ne shënjestrën e ligjit të ri lista me të cilët do të përcaktohet me vendim të Këshillit të Ministrave, por ndryshimet duket se janë gjithëpërfshirëse pasi prekin shumë kategori tatimpaguesish. Një pjesë e tyre, pritet të nisin zbatimin nga 1 janari 2023.
Kështu, referuar draft-ligjit të ri individët që përfitojnë të ardhura nga punësimi deri në 2.4 milionë lekë në vit do të tatohen 13%, kurse për ata që tejkalojnë mbi 2.4 milionë lekë të ardhura norma e tatimit maksimale është 23%.
Ndryshime parashikohen edhe për deklaratën vjetore të të ardhurave personale. Nëse me ligjin aktual detyrimin për dorëzimin e saj e kanë të dypunësuarit dhe individët që përfitojnë mbi 2 milionë lekë në vit nga punësimi, me ligjin e ri pragu ulet në 1. 5 milionë lekë, duke bërë që kushdo që merr të ardhura bruto në këtë masë të bëjë dorëzimin e deklaratës vjetore.
Ndërhyrjet e ligjit të ri shkojnë më tej pasi parashikohet taksim i të ardhurave nga biznesi i çfarëdo lloji. Një regjim i veçantë taksimi do të ndiqet për bizneset bazuar në sektorin ku operojnë, ku nga të ardhurat e tyre do të zbriten shpenzimet e supozuara si një shumë e vetme.
Për veprimtaritë prodhuese do të zbriten 60% e të ardhurave, 90% për tregtinë me shumicë, 70% për tregtinë me pakicë, për baret dhe restorantet 60%, për artizanët 50% dhe për individët e punësuar do të zbriten 30% e të ardhurave, nga 35% që ishte në draftin fillestar.
Pas zbritjes së këtyre të ardhurave sipas fushave do të bëhet edhe tatimi për pjesën e mbetur të tyre si të ardhura personale.
Po ashtu, me sistemin e ri propozohet taksim për të ardhurat nga prodhimi bujqësor ose blegtoral, për tjetërsimin e pasurive të paluajtshme apo të aseteve të biznesit.
Gjithashtu, me ligjin e ri do të kenë detyrimin të paguajnë tatim 15% individët që marrin një dhuratë apo trashëgiminë, që mund të jetë pasuri e luajtshme ose e paluajtshme ose para të fituara.
Taksat për korporatat mbeten të pandryshuara me një normë tatimi 8% dividenti dhe 15% tatimi mbi fitimin, ndërsa bizneset e vogla me xhiro deri në 14 milionë lekë do të paguajnë zero tatim fitim deri më 2029.
