Politikanët më të lartë në Kosovë dhe në Shqipëri po përshëndesin një zëri vendimin e Komisionit Europian përti propozuar Këshillit të BE-së dhe Parlamentit heqjen e vizave me Kosovën. Kryeministri i Shqipërisë Edi Rama më shumë se sa një përshëndetje ka një thumbim për zyrtarët europianë. Ai e ka cilësuar një çlirim nga turpi këtë vendim të sotëm. “Fill pas UEFA-s tjetër lajm i gëzueshëm për Kosovën rekomandimi i Komisionit për heqjen e vizave. Më në fund BE-ja po çlirohet nga një turp!”, shkruan ai para pak minutash në facebook.
Ndërkohë Presidenti i Kosovës, Hashim Thaçi, ka shkruar se pas shumë dekadave të izolimit, nuk do të ketë më pritje para ambasadave dhe nuk do të ketë më refuzime të vizave.
“Nuk kemi fituar dhuratë, por kemi merituar liberalizimin me punën tonë të përbashkët. Kur punojmë bashkë, asnjë kufi nuk na ndal. Urime liberalizimi sot, urime edhe për UEFA dje. Javë historike”, ka shkruar Thaçi.
Edhe kryeministri i Kosovës, Isa Mustafa ka uruar qytetarët për rekomandimin e dhënë nga KE për liberalizimin e vizave. Në një postim në rrjetin social Facebook ka thënë se rezultatet e punës së Qeverisë së tij janë cdo ditë e më të prekshme.
“Urime Qytetarë të dashur! Rekomandimi pozitiv për heqjen e vizave është vlerësimi më i merituar për qytetarët e Republikës së Kosovës nga Bashkimi Evropian. Rezultatet e punës së Qeverisë çdo ditë e më shumë janë të prekshme për qytetarët e Kosovës, qytetarë të kontinentit dhe të vlerave evropiane”.
