Mjeku Leon Kaza ka reaguar pas konfirmimit të infermieres së infektuar me Covid-19 në Lezhë.
Përmes një statusi në ‘Facebook’, ai i bën apel qytetarëve që të mos fokusohen tek rasti konkret, por të zbatojnë masat mbrojtëse.
Sipas Kazës, askush nuk është imun dhe të jesh i prekur nga koronavirusi nuk është njollë për t’u dalluar.
Më tej Kaza falenderon stafin mjekësor të spitalit të Lezhës si dhe mjekët e Infektivit, të cilët ndodhen në zonën e parë të rrezikut.
Statusi i plotë:
Në orët e vona të ditës së djeshme në spitalin Lezhë u konfirmua rasti i parë i prekur nga COVID-19, një infermiere në shërbimin parësor. Ishte vetëm çështje kohe konfirmimi i diçkaje që prej ditësh po themi. Virusi është mes nesh. Konfirmimi i një rasti apo mungesa e një konfirmimi të tillë, as duhet të zgjojë histeri kolektive në panik në rastin e parë dhe as duhet të ulë vigjilencën dhe kujdesin në rastin e dytë.
Kam vërejtur se shumë kërkojnë të dinë emrin e personit të prekur, ndoshta me idenë për tu ruajtur. Nuk ka kurrfarë rëndësie. Emri mund të jetë kushdo, secili prej nesh.
Askush s’është imun dhe të jesh i prekur nga COVID-19 nuk është arsye për linçim apo njollë për tu stigmatizuar.
Ka vetëm një mënyrë për tu mbrojtur; zbatimi rigoroz i masave të rekomanduara nga institucionet shëndetësore, ndjekja me përpikmëri e udhëzimeve të MShMS.
Në media sot fatmirësisht një zë të rëndësishëm zënë mjekët, kryesisht mjekët e Spitalit Infektiv, i kthyer në spital të dedikuar COVID, natyrisht meritojnë gjithë admirimin tonë.
Por unë sot dua të falenderoj personelin shëndetësor të linjës së parë, mjekët dhe infermierët e urgjencës, imazheristët dhe teknikët e imazherisë dhe gjithë personeli tjetër mbështetës të spitalit Lezhë e jo vetëm, të cilët janë porta e parë e sistemit, janë mburoja e parë e shëndetit, janë në zonën e parë të rrezikut, ndaj meritojnë mbështetjen dhe respektin e kujtdo. Për sot dhe për nesër!
