Policia e Tiranës ka arrestuar tetë persona gjatë 24 orëve. Mësohet se forcat “Shqiponjat”, në bashkëpunim me Seksionin për Hetimin e Narkotikëve ka arrestuar një 20-vjeçar.
Gjatë kontrollit fizik, A. Q., iu gjet e u sekuestrua një sasi me lëndë narkotike e dyshuar cannabis sativa. Po ashtu, është arrestuar edhe 34-vjeçari A.A. Këtij të fundit, iu gjet në lokalin që kishte marrë me qira një tavolinë në të cilën gjendeshin çipsa si ato që përdoren për lojërat e fatit dhe disa letra bixhozi, të cilat u sekuestruan në cilësinë e provës materiale.
Në flagrancë u arrestua edhe I. A., 56 vjeç, sepse në mënyrë të vazhdueshme ka përndjekur dhe ngacmuar një grua 53-vjeçare. Në pranga ka përfunduar edhe një 64-vjeçar me inicialet T. Ll., pasi ka ushtruar dhunë fizike dhe psikologjike ndaj bashkëshortes së tij.
Për dhunë fizike dhe psikologjike ndaj bashkëshortes është arrestuar edhe 39-vjeçari A. M., Gjatë kontrollit të ushtruar në banesë u gjet e sekuestrua në cilësinë e provës materiale një sasi municioni luftarak.
Po ashtu, në 24 orët e fundit u kap dhe u ndalua A. M., 43 vjeç, i shpallur në kërkim për dhunë në familje.
Specialistët e Qarkullimit Rrugor arrestuan S. M., 43 vjeç dhe O. N., 41 vjeç, pasi u kapën duke drejtuar mjetet përkatëse në gjendje të dehur. Në gjendje të lirë u procedua N. Sh., 25 vjeç, pasi në Qafë Priskë, u konstatua duke transportuar me mjetin e tij, lëndë drusore pa leje përkatëse.
