Qeveria: Jo korrupsion, evitojmë kontaktin me nëpunësit e shtetit
Duke nisur nga muaji prill çdokush që ka nevojë për një leje ndërtimi do të aplikojë on line për marrjen e saj nëpërmjet portalit e-Albania. Në këtë mënyrë qeveria pretendon se do të zhdukë korrupsionin nga ky sektor jo pak i përfolur. “Nuk do të ketë më ryshfet sepse me aplikimin on line evitohet kontakti i drejtpërdrejtë me nëpunësit e shtetit por njëkohësisht edhe përshpejtohen procedurat për qytetarët”, thuhet në një njoftim të ministrisë së zhvillimit urban.
“Sistemi elektronik do të thjeshtojë punën e bashkive në shqyrtimin e lejeve të ndërtimit por në anën tjetër shton akoma më shumë përgjegjësitë për të gjitha bashkitë dhe institucionet e përfshira në dhënien e lejeve. E them këtë sepse sistemi do të monitorohet sa i përket vonesave do të informojë në kohë qytetarin se në cilin institucion ka mbetur praktika e tij”, deklaroi Eglantina Gjermeni, ministre e Zhvillimit Urban. Ndërkohë zëvendës kryeministri Niko Peleshi është shprehur se: “Nuk ka më bllokim të lejeve të ndërtimit, dhënia bëhet sipas ligjit dhe ligji thotë që për territoret ku ka plane nuk ka asnjë kufizim. Po ashtu kemi lënë edhe një hapësirë tjetër ku për objekte me karakter ekonomik dhe për banim edhe në territoret ku nuk ka plan lejohet”.
Për këto bashki, deri në miratimin e planeve vendore, lejet e ndërtimit për objekte mbi 6 kate do të jepen vetëm pasi më parë kërkesa shqyrtohet nga Këshilli Kombëtar e Territorit.
