Endërra e Leiçesterit për të fituar titullin e madh në Premier League vazhdon. Me fitoren e rradhës në transfertë ndaj Kristal Palas (0-1), skuadra e Ranierit udhëheq me tetë pikë diferencë ndaj Totenhemit, që do të ndeshet nesër në Londër me Bërnmëth. Goli i vetëm i takimit u shënua nga Rijad Mahrez, në të 34’, pas një harkimi të saktë të Xhemi Vardi. Pra ajo që u nis si shaka e këndëshme, duket se u kthye në një realitet të pabesueshëm. Vetëm shtatë ndeshje nga përfundimi i edicionit dhe “dhelprat” që në fillim kuotoheshin 1 me 500, tani janë më pranë se kurrë kurorës. Të pa shqetësuar nga Arsenal (-11 pikë) dhe sikurse nuk do ta kishte parashikuar askush, Leiçester ndodhet 25 pikë përpara çelësit në tabelën e klasifikimit. Skuadra e Hidink nuk gjeti shpëtim pas shkarkimit të Murinjos, madje me barazimin e djeshëm 2-2 në shtëpi ndaj Uest Ham ndodhet gjashtë pikë larg Mançester Junaitid, i fundit që mbyll renditjen për zonën “Europa League”, ndërkohë që ekipi i Van Gal ka edhe një ndeshje më pak.
