Deputeti i Partisë Socialiste Armando Prenga ka dorëzuar sot mandatin e deputetit. Ai i ka dërguar një letër Kryetarit të Kuvendit, Ilir Meta, me anë të së cilës i kërkon nisjen e procedurave për largimin e tij si deputet i Partisë Socialiste.
Armando Prenga shkruan në letrën e drejtuar Kryetarit të Kuvendit, Ilir Meta që ka vendosur të dorëhiqet, megjithëse nuk preket nga procesi i dekriminalizimit.
Ndërsa akuzat e opozitës Prenga i ka konsideruar si shpifje që cënojnë figurën e tij dhe të familjes së tij.
Mandatin e tij, tashmë do ta gëzojë LSI-ja e kryetarit të Kuvendit, sepse PS e ka mbaruar listën e saj dhe sipas ligjit i takon aleatit të saj në koalicion. Largimi i Prengës dobëson edhe më forcën e Partisë Socialiste brenda koalicionit që mban qeverinë në këmbë, ndërsa nga “Çadra e lirisë” vazhdojnë ftesat për Ilir Metën, me qëllim rrëzimin e qeverisë Rama.
