Banorët e lagjes Laprakë në kryeqytet janë ngritur sërish në protestë kundër ndotjes së ajrit nga fabrika e çimentos “Edil Centro” pranë tyre.
Banorët ankohen se ajri është i ndotur jo vetëm nga pluhuri i rrugës kryesore por edhe nga pluhuri toksik nga fabrika e çimentos.
“Nuk po mbushemi dot me frymë, po thithim pluhurin e cimentos. Kjo bashki që përze fshatarët e shkretë që shesin një dorë spinaq a labot për fëmijët e tyre dhe i degdis s’dimë se ku, lejon këtë biznes së madh të na marrë frymën”, tha një zonjë, banuese në lagjen Laprakë.
Një tjetër banor shprehet se ndonëse kanë zhvilluar takim me fabrikën, nuk është marrë asnjë masë parandaluese që nga maji i këtij viti
“Më 20 maj kemi bërë takimin e fundit me fabrikën. Na thanë na lini tre muaj se kemi filtrat të shkatërruar. Kaluan…Ku e gjejnë fuqinë këta që vazhdojnë kundër ligjit? Ne një makinë të vogël kemi e s’na e kalojnë tek Kolaudimi për ndotjen, aq e vogël sa është. Po gjithë ky oxhak?! Ne do ta ndjekim protestën në rrugë ligjore dhe në fund pastaj….Kjo nuk është protestë mjedisore, është protestë për jetën se po vdesin njerëzit nga kanceri. Këta e kanë pezulluar punën ditën dhe e kanë trefishuar natën. Këta janë shumë arrogantë, po na vrasin. Kjo është vrasje e heshtur”, tha banori.
