Ish Presidenti Ilir Meta në një deklaratë për mediat nga selia e LSI paraditen e të hënës ka thumbuar vendimin e kryeministrit Edi Rama që ka shkarkuar sot kryenegociatorin me BE Zef Mazin.
“Ja që nuk ka vetëm 24 korrik po ka dhe 25 korrik. Një ditë e re, një agim i ri dhe një rrugë e re. Erdha sot këtu sepse kisha pak nostalgji për këtë dokumentin e LSI e se jam krenar që në 2004 kam ngritur një forcë politike për të shpëtuar integrimin e Shqipërisë që mbahej peng nga PS e falë atij angazhimi të jashtëzakonshëm të LSI u bë rrotacioni kleptokracia humbi mbi 20 e ca mandate e falë atij rrotacioni Shqipëria firmosi marrëveshjen e stabilizim asociimit. Ne shkarkuam kryenegociatorin pa nisur ende negociatat. Edi Rama mban peng integrimin e Shqipërisë në Bashkimin Europian”, tha Meta.
Ditën e djeshme, Meta përfundoi mandatin 5-vjeçar si president i Republikës dhe ia dorëzoi detyrën kreut të ri të shtetit, Bajram Begaj. Sikurse e ka paralajmëruar ai do t’i kthehet politikës aktive. Në orën 19:00 LSI mban sot Konventën Kombëtare ne Pallatin e Kongrese dhe Meta pritet që të konfirmohet si kryetar i saj.
