Seanca e fundit parlamentare për këtë sesion legjislativ do të jetë më 10 gusht. Parlamenti do të mblidhet në seancë plenare për të miratuar shtatë ligjet e reformës në drejtësi. Data 10 gusht është më e afërta që lejon Kushtetuta për miratimin e shtatë ligjeve të reformës në drejtësi. Kjo, për shkak se ligjet që rrjedhin nga ndryshimet kushtetuese nuk mund të miratohen më herët se 15 ditë, pasi ndryshimet në Kushtetutë dekretohen nga Presidenti.
Presidenti Nishani, i dekretoi ndryshimet në kushtetutë më datë 26 korrik, ndërsa afatet e përcaktojnë datën 10 gusht si më të parën ditë, kur Kuvendi mund t’i miratojë shtatë ligjet. Kjo do të ndodhë nëse opozita do të jetë dakord me draftin ose në të kundërt ka vetëm dy javë kohë për t’i diskutuar e për të gjetur marrëveshje me draftet e shtatë ligjeve. Ato janë hartuar nga shumicaca në Komisonin e Posaçëm Parlamentar të Reformës në Drejtësi, teksa opozita e pati bojkotuar këtë komision. Edhe nëse palët nuk do mund të bien dakord për të shtatë projektligjet, njëri prej tyre, ai i vetingut, do të duhet të miratohet medoemos brenda kësaj legjislature. Këtë e ka kërkuar SHBA dhe BE.
Ndërkohë, komisioni i reformës në drejtësi pritet të mblidhet këtë të mërkurë për të diskutuar për procedurën që do të ndiqet për miratimin e shtatë ligjeve në Parlament, si dhe për të njohur deputetët e opozitës me draftin e shtatë ligjeve të reformës në drejtësi.
Ja cilat janë shtatë projektligjet e reformës në drejtësi
-Projektligji për disa shtesa dhe ndryshime “Në ligjin nr.8577, datë 10.02.2000, “Për organizimin dhe funksionimin e Gjykatës Kushtetuese të Republikës së Shqipërisë”.
-Projektligji “Për Statusin e Gjyqtarëve dhe Prokurorëve në Republikën e Shqipërisë” dhe procesi për shqyrtimin e tij nga Kuvendi.
-Projektligji “Për Organizimin e Pushtetit Gjyqësor në Republikën e Shqipërisë”.
-Projektligji “Për Organizimin dhe Funksionimin e Prokurorisë në Republikën e Shqipërisë”.
-Projektligji “Për Rivlerësimin e Gjyqtarëve dhe Prokurorëve në Republikën e Shqipërisë”.
-Projektligji “Për Organizimin dhe Funksionimin e Institucioneve në Luftën Kundër Korrupsionit dhe Krimit të Organizuar”.
-Projektligji “Për Organet e Qeverisjes së Sistemit te Drejtësisë në Republikën e Shqipërisë”.
