Seanca e Kuvendit nisi me një minutë heshtje në nderim të albanologut me origjinë kanadeze, Robert Elsie, i cili u nda nga jeta pak ditë më parë në Berlin, Gjermani pas një sëmundje të rëndë.
Amaneti i tij i fundit ishte të prehej në Shqipëri.
Elsie u lind në vitin 1950 në Vankuver të Kanadasë, kreu studimet në Universitetin e Kolumbisë Britanike për Filologji Klasike dhe Gjuhësi në vitin 1972. Më tej, vijoi studimet në Berlin e më pas në Paris, në Institutin e Dublinit në Irlandë dhe në Universitetin e Bonit, ku dhe mbrojti doktoraturën më 1978-n.
Që nga ky vit, ai nisi të vizitonte Shqipërinë disa herë në kuadrin e “takimeve shkencore” midis Institutit të Gjuhësisë së Universitetit të Bonit dhe Akademisë së Shkencave të Shqipërisë. Për 11 vite, që prej vitit 2002 deri në 2013, ai punoi për Gjykatën e Hagës.
