Një oficer policie është plagosur rëndë gjatë përplasjes me armë mëngjesin e sotëm në Elbasan teksa forcat e rendit i ishin vënë në ndjekje një makine që nuk u ndaloi.
Mësohet se polici i plagosur rëndë quhet Eugen Abdurrazaku. Gjithashtu raportohet se gjatë përplasjes me armë kanë mbetur të plagosur edhe dy persona të tjerë.
Ngjarja
Policia i kërkoi të ndalonte një makine tip “Passat” që po vinte nga Librazhdi në Elbasan. Në momentin kur makina nuk ka ndaluar, policët i kanë hedhur në rrugë zinxhirë me gozhdë me qëllim çarjen e gomave.
Në këtë moment ka patur përplasje me armë mes policëve dhe dy personave që ndodheshin në automjet. Mësohet se nga përplasja kanë mbetur të plagosur tre persona. Dy prej të plagosurve janë personat që po udhëtonin me automjetin “Passat”, kurse një tjetër është punonjës policie.
