E njohur si një njeri i afërt i kryeministrit, ajo shërbeu për 11 vite si anëtare e Këshillit Bashkiak të Tiranës në kohën kur kjo bashki drejtohej nga Edi Rama
Ekspertja e statistikave, Milva Ekonomi, është nga sot ministrja e re e Ekonomisë. Ajo zëvëndësoi Arben Ahmetajn në këtë detyrë, pasi ai u emërua ministër i Financave në vend të Shkëlqim Canit.
Emërimi i saj nga Rama mund të ketë ardhur si suprizë në sytë e publikut, por jo në rrethet e politikës dhe sidomos në rrethin e kryeminsitrit Rama. Ajo është një zgjedhje tërësisht e tij, ashtu siç është investimi i kahershëm i karrierës së saj në shërbim të Ramës.
Milva Ekonomi është një ndër zyrtarët që ka qëndruar afër kryeministrit Rama e kryetarit aktual të Bashkisë së Tiranës, Erjon Veliaj, përmes aktivizimit në lëvizjen Mjaft.
Kush e mban mend si Erjon Veliaj u bë i njohur për publikun me anë të lëvizjes civile Mjaft, mban mend gjithashtu se kësaj lëvizje iu bashkuan disa figura që vinin me një begraund të konsoliduar më parë dhe një prej tyre ishte Ekonomi.
Milva Ekonomi e ka nisur karrierën e saj në krye të Institutit të Statistikave qysh në qeverisjen e parë të PD-së e drejtuar nga kryeministër Aleksandër Meksi në vitin 1994. Kur erdhi Partia Socialiste në pushtet në vitin 1997 nuk e shkarkoi Ekonomin. Ajo qëndroi në krye të këtij instituti deri në në vjeshtën e vitit 2005 kur u shkarkua nga qeveria Berisha.
Për tetë vite të qeverisë Berisha, Milva Ekonomi, u aktivizua me shoqërinë civile e pozicionuar afër opozitës së atëhershme të kryesuar nga Edi Rama. Instituti Agenda, një qendër kërkimesh ekononomike dhe sociale, është themeluar nga Ekonomi në vitin 2006.
Gjatë tetë viteve në opozitë, Milva Konomi ka punuar në disa projekte jashtë vendit ndër të cilat edhe si eksperte në Agjencinë Evropiane për Rindërtim (EAR) në Kosovë, në projektin mbi Mbështetjen në Sistemin Statistikor dhe Përgatitjen e Rregjistrimit të Popullsisë në Kosovë 2007 – 2008.
Ndërkohë, Ekonomi ka qënë anëtare e Këshillit Bashiak të Tiranës për periudhën 2000-2011, kohë kur kjo bashki drejtohej nga Edi Rama.
Në vitin 2013 kur PS u kthye në Pushtet, Ekonomi u emërua zëvëndësminstre në Ministrinë e Shëndetësisë. Milva Ekonomi u akuzua nga opozita krahas ministrit Beqaj për shumë afera korruptive lidhur me konçesionet e tenderat e dhënë nga kjo ministri.
Së fundmi ajo u besua nga Rama si drejtoreshë e komanduar për disa muaj radhazi në krye të Fondit të Sigurimeve pas skandalit të korrupsionit që përfshiu këtë institucion.
Sot ajo ka marrë nga Rama një nga detyrat më të larta të karrierës së saj, drejtimin e ministrisë së Ekonomisë, duke shënuar kështu dhe një tjetër anëtar besnik në kabinetin e tij.
