Ish-kreu i sindikatës së punonjësve të Policisë së Shtetit, Sadedin Fishta ka komentuar dorëheqjen e mundshme të Gledis Nanos dhe krizën në radhët e Policisë së Shtetit që është në favor të krimit.
Prej ditës së djeshme po qarkullon lajmi ende e pakonfirmuar zyrtarisht, se Nano ka dhënë dorëheqjen dhe flitet për emra të ndryshëm që do e zëvendësojnë në një situatë kur kriminaliteti është rritur, ndërsa zbulueshmëria e ngjarjeve ka rënë.
“Dikujt i intereson kjo situatë, sigurisht që krimit. Grupet kriminale po veprojnë, sëbashku me të gjithë ata persona që i mbështesin si brenda policisë edhe jashtë”, tha Fishta.
Ndërsa eksperti i kriminalistikës, Arben Hajdarmataj tha se nëse Nano ka dhënë dorëheqjen, kjo ka ndodhur sepse ai nuk ka dashur të bëjë kompromise. Sipas tij kjo meriton vlerësimin maksimal.
Shemsi Prençi, ish-drejtor policie gjykon se Gledis Nano u mor ‘peng’ nga politika. Sipas tij ai nuk pati mundësi as të promovojë punonjës të ri të policisë me integritet. Prençi shtoi gjithashtu se Nano nuk pati sukses në luftën kundër krimit./Pamfleti
