Kryeministri i Kosovës Albin Kurti ka shtyrë me 48 orë zbatimin e fazës së dytë për riregjistrimin e targave ilegale serbe në RKS. Vendimi u mor pas kërkesës që bënë Shtetet e Bashkuara të Amerikës. Kurti falenderoi ndër të tjera ambasadorin Hovenier për përkushtimin ndaj procesit të dialogut.
“Unë e pranoj kërkesën e tij për shtyrje prej 48 orë të fillimit të gjobitjes për targa ilegale ‘KM’ (dhe tjera). Jam i lumtur të punoj me SHBA-në dhe BE-në. Për të gjetur një zgjidhje gjatë dy ditëve të ardhshme”, ka shkruar Kurti në Tqitter.
Ambasadori amerikan në Kosovë, Jeffrey Hovenier, ka thënë se Shtetet e Bashkuara i kanë kërkuar Qeverisë së Kosovës shtyrje 48-orëshe të vendimit për shqiptimin e gjobave. Për t’i lejuar zyrtarët evropianë dhe ata amerikanë që të angazhohen me Kosovën dhe Serbinë për të gjetur zgjidhje për këtë çështje.
Pas kësaj, Kurti ka thënë se është i gatshëm të punojë me SHBA-në dhe BE-në për të gjetur zgjidhje në dy ditët e ardhshme.
Ndryshe, gjatë takimit të së hënës në Bruksel, Kosova ka propozuar që të pezullojë fazat e mëtejshme që kanë të bëjë me targat. Në këmbim që Serbia më të mos lëshojë targa ilegale me akronime të qyteteve të Kosovës.
E po ashtu BE-ja të fillojë procesin e bisedimeve për propozimin e fundit të mbështetur nga Gjermania dhe Franca.
Por Bashkimi Evropian e ka hedhur poshtë duke kërkuar që Kosova të mos shqiptojë gjoba për targat ilegale dhe Serbia të mos prodhojë tabela të reja KM.
Propozimi i BE-së është refuzuar nga Kurti, ndërsa është përkrahur nga Vuçiç.
