Kryeministri Albin Kurti këtë të martë ka dhënë detaje në lidhje me situatën e krijuar nga zjarret në Kosovë.
Kurti ka pranuar se nuk ka mjaftueshëm zjarrfikës, ai tha se komunat e rrezikuara nga zjarret janë duke u ndihmuar nga ato fqinje për ta përballuar situatën me përhapjen e zjarreve.
Megjithatë kryeministri Kurti theksoi se këto komuna kanë pajisje të mjaftueshme në kuadër të Brigadave të Zjarrfikësve.
Ndër të tjera, Kurti tha se mbajtja nën kontroll e këtyre zjarreve paraqet një sfidë të madhe për Kosovën.
“Ne tash si institucione po mobilizohemi maksimalisht. Kemi kërkuar edhe ndihmën e FSK-së, e madje edhe të KFOR-it. Besoj që mbajtja nën kontroll e këtyre zjarreve të egra paraqet një sfidë të madhe për shtetin tonë. Kemi arritur që tash për tash të mos kemi dëme të mëdha materiale e sidomos dëme në njerëz”, ka thënë ndër të tjera Kurti.
