Ndërsa në Tiranën e nxehtë, e parë nga ballkoni jeta duket monotone dhe e qetë, ky qytet zien. Vetëm sot u zbuluan dy raste të prostitucionit, specifike në llojin e tyre. Fillimisht mediat shkruan për një rast të prostitucionit modern, atë online. Para e madhe në lojë, në mesin e Tiranës. Gjithçka niste me një njoftim në gazetë: “Kërkojmë vajza nga 18 deri në 30 vjeç, paga 800-1200 euro”. Toka e premtuar.
Në Shqipëri edhe pse çmimet, taksat e nevojat duket se shtohen vazhdimisht, rrogat mbeten pasqyra më e mirë për të kuptuar dëshpërimin e njerëzve që gjejnë zgjidhje tek mundësitë anonime. Kështu, vajzat e shtynin veten të besonin në mrekulli dhe bënin një intervistë pune, në shtëpinë ku më pas do të ishte vendi që donin ta braktisnin, por që s’mundeshin. Tutorja, një grua, potencialisht nënë e atyre vajzave i kërcënonte me videot e çatit online nëse ato donin të iknin.
Pse vajzave u gënjehet mendja që të zgjedhin rrugën e lehtë , të manipulohen nga një pagesë e majme, na takon të gjithëve ta analizojmë e të gjejmë fajet tek e tërë shoqëria ashtu siç kemi merita për të gjitha vajzat që njëkohësisht studiojnë e punojnë, fitojnë pak por flenë të qeta dhe krenojnë prindërit.
Rasti i dytë ishte tradicionali, “prostitucion klasik”, seks kundrejt pagesës. Po si niste? Sërish një grua, parukiere këtë herë, s’dihet se mbi ç’kritere zgjidhte të favorizonte disa vajza që për shërbimet që iu ofronte të mos iu merrte para. Ndoshta duke përzier bojën “ i bënte magjinë” vajzës së radhës. Të rejat, pas disa lyerje flokësh a thonjsh gratis përballeshin me listën e borxheve që mund të shlyhej duke kryer marrëdhënie seksuale me miqtë e parukieres, biznesmenë mbi 50-vjeçarë shqiptarë e kosovarë.
Nga ballkoni Tirana nuk zien, por kushedi se ç’ndodh në parukerinë përballë ballkonit. Dhe ne ecim të qetë në Tiranën me diell, që zien.
