Futbolli shqiptar bëhet gati për një periudhë të ngjeshur ndeshjesh si pasojë e ndryshimeve që pësoi kalendari i aktiviteteve për shkak të Botërorit 2022. Por paralelisht me punën në fushë, klubet duhet të bëjnë edhe punën jashtë saj për licencimin për sezonin pasardhës, sidomos klubet e Superiores që synojnë të marrin pjesë në Kupat e Europës në verë.
Kjo është arsyeja pse FSHF ka nisur konsultimet me skuadrat për kriteret e licencimit për pjesëmarrjen në aktivitetet europiane. Sekretari i FSHF-së, Ilir Shulku, e ka nisur gjithçka me Tiranën e Partizanin, duke ftuar drejtuesit e dy klubeve për të diskutuar ndryshimet e këtij viti dhe kriteret që duhet të plotësojnë.
Kriteret
“Klubet duhet të përmbushin gjashtë kriteret që kërkohen për të përmbyllur me sukses këtë proces, që janë kriteri sportiv, kriteri i infrastrukturës, kriterin e ri të përgjegjësisë sociale, kriterin ligjor, kriterin e administratës dhe personelit dhe për kriterin financiar. Për pesë kriteret e para, afati i brendshëm për dorëzimin e dokumentacioneve si online ashtu edhe fizikisht, është lënë data 31 janar 2023, ndërsa afati përfundimtar është data 28 shkurt 2023. Kurse për pjesën e kriterit financiar afati përfundimtar është 31 mars 2023 sipas ligjeve të shtetit shqiptar”, shkruhet në njoftimin e Federatës rreth kësaj mbledhje.
Klubet shqiptare kanë kaluar shpesh probleme nga më të ndryshmet në momentin e licencimit të tyre për Kupat e Europës, sidomos sa i përket kritereve financiare pasi vuajnë vazhdimisht situata të borxheve që kanë si pasojë e mosshlyerjve të detyrimeve ndaj ish-lojtarëve apo palëve të treta.
