Deputetët e grupit të PD që deri më tani kanë shprehur qëndrimin e tyre kundër Sali Berishës, janë mbledhur në një lokal në Tiranë për të diskutuar mbi të ardhmen e aksionit të tyre politik. Disa nga deputetët e selisë blu kanë shprehur keqardhje që PD nuk ishte e përfaqësuar sot në Bruksel, kur shënohej kjo ditë historike për Shqipërinë, siç është nisja e bisedimeve të anëtarësimit. Gjatë mbledhjes, ata ia kanë faturuar krisjeve në PD, mungesën e përfaqësimit në Bruksel, në ditën historike të hapjes së negociatave.
Kjo mungesë në tryezë sipas shpjegimeve të 24 deputetëve është pasojë e problemeve të brendshme në parti.
Ndërkohë, mësohet se kanë qenë Lefter Gështenja dhe Flamur Hoxha ata që kanë ftuar deputetët që të diskutojnë për të ardhmen në PD.
Këta deputetë, më saktë shumica e tyre iu bashkuan protestës së thirrur nga Sali Berisha kundër kryeministrit Edi Rama. Protesta e 7 korrikut ishte pika kur shumë deputetë që ishin kundër Berishës u bashkuan me të, por ata kërkuan që pjesëmarrja të lexohej si bashkim me kauzën kundër Ramës dhe jo për Berishën personalisht.
