Kulla “Eiffel” pret vizitorin e saj të 300 miliontë, që kur është hapur në vitin 1889.
Kulla u përurua rreth 130 vite më parë dhe është një prej monumenteve më të njohura në botë dhe vetëm vitin e kaluar u vizitua nga 5.8 milionë njerëz.
Po ashtu, “Eiffel” është monumenti më i vizituar me pagesë në botë, me njerëzit që ngjiten nëpër shkallët e pafundme të saj, ose marrin ashensorin për t’u ngjitur në njërin nga 3 nivelet e saj.
Kur nisi ndërtimi, në korrik të vitit 1887, një grup prej rreth 300 artistësh, skulptorësh dhe arkitektësh u dërguan një peticion autoriteteve, ku kërkonin ndalimin e ndërtimit të kullës, sipas tyre “qesharake”.
Fatmirësisht autoritetet i injoruan ankesat e tyre dhe kulla, përveçse është shndërruar në simbolin e Francës, është bërë e njohur për pothuajse çdo banor të globit.
