Në të 91’, Emini e përplas topin në shtyllë, kur gjendej vetëm 3-4 metra larg portës së boshatisur
Një gjë ia vlen të përmendet, skuadrat e Safet Gjicit në këto vitet e fundit nuk kanë qenë asnjëherë inferior ndaj çdo kundërshtari. Edhe kundër Austrisë së Vjenës, duke përjashtuar 30 minutat e para, më pas meritoi një rezultat më të mirë se humbja minimale. Sidoqoftë, ndeshja e parë e turit të dytë paraeleminator të Europa League përfundoi 1-0 në favor të vendasve. Ishte një gabim i Micit në mesfushë, në të 23’, që i dha mundësinë Kajodes të depërtojë nga e djathta, më pas një asist për Felipe Peres, i cili nuk e ka të vështirë ta shtyjë topin në rrjetë, 1-0. Kuksianët e filluan ndeshjen duke e pritur kundërshtarin në gjysmëfushën e tyre, duke i dhënë kështu shumë mundësi, por pas minutës së 30-të e kuptuan se Austria e Vjenës është vetëm një emër i vjetër. Lilaj, Latifi dhe Fukui fillojnë të përshtaten me lojën e skuadrës së tyre të re dhe në pjesën më të madhe të pjesës së dytë është skuadra e Likës që dominon, ndërsa kulmi arrin në të 91’. Musolli godet nga jashtë zonës dhe portjeri vendas e pret topin me vështirësi, duke e lënë në zonë. Emini e gjen 3-4 metra larg portës së boshatisur, por godet shtyllën. Ky po që është mëkat, por kuksianët kanë edhe një tjetër shans një javë më pas në “Elbasan Arena” dhe tashmë duhet ta kenë të qartë, që vjenezët duhen sulmuar pa i bërë komplimente dhe kështu kualifikimi mbetet në kuotat 50 me 50 %.
