Dy fëmijë nga Kukësi, kanë përfunduar në lumë teksa kalonin me një biçikletë mbi urë. Ngjarja e rëndë u shënua ditën e sotme tek vendi i njohur si Ura e Vjetër e Uzinës në Kukës. Të miturit me moshë 12-vjeçare, u ndihmuan nga banorët e zonës duke i nxjerrë në breg, dhe nga andej u dërguan për në spital.
Për marrjen e mjekimit më të specializuar ata u dërguan me helikopter drejt Spitalit të Traumës, në Tiranë. Mësohet se pavarësisht dëmtimeve të marra dhe gjendjes së rëndë, fëmijët ndodhen jashtë rrezikut për jetën. Dyshohet se gjithçka ka ndodhur si pasojë e pakujdesisë gjatë drejtimit të biçikletës, ndërkohë që policia po heton për të zbuluar më shumë rreth ngjarjes.
