Drejtori i Përgjithshëm i Policisë së Shtetit, Ardi Veliu ka dhënë alarmin për përdorimin e internetit nga organizatat terroriste.
Nga seminari i mbajtur në Tiranë për përdorimin e teknologjisë nga grupet e terrorit, Veliu tha se prindërit duhet të kenë kujdes për faqet që aksesojnë fëmijët, pasi në rrjetet sociale janë identifikuar dhjetëra përmbajtje që nxisin aktivitetet terroriste.
“Nga viti 2015, në platformat Twitter dhe Facebook janë shtuar ndjeshëm bllokimet e llogarive të lidhura me terrorizmin, duke ndihmuar kështu në uljen e aktivitetit të ekstremistëve. Analistët vlerësojnë se ata prapë do vazhdojnë të përdorin mediat sociale në një shkallë më të vogël, pasi këto platforma ndihmojnë në shpërndarjen e propagandës në shkallë të gjerë. Përfitoj nga rasti që të ftoj çdo prind, çdo të ri apo të re, çdo grup shoqëror që konstaton sjelle që çojnë në dyshime për përdorim të këtyre aplikacioneve me karakter terrorist, të kontaktojnë menjëherë me Policinë e Shtetit nëpërmjet numrit 112, aplikacionit Komisariati Dixhital, apo në adresat zyrtare të Policisë së Shtetit, për të bërë të mundur që bashkërisht të ndërtojmë një ambient shoqëror sa më të sigurt për të ardhmen e fëmijëve tanë”, ka deklaruar drejtori i Përgjithshëm i Policisë së Shtetit, Ardi Veliu.
