Në një kohë kur shumica e demokratëve e refuzuan në zgjedhjet e 6 Marsit duke e nxjerrë Partinë Demokratike, në vendin e tretë dhe shumë deputetë i kërkuan dorëheqjen, Basha siç duket nuk ka ndërmend të tërhiqet. Edhe në mbledhjen e sotme të Kolegjit të Kryetarëve në selinë blu, kryetarët e degëve që janë të vetmit i shkojnë nga pas për shkak të frikës së karriges, i kanë mbajtur përsëri “temena”.
Kryetari i emëruar i degës së PD në Fier, Agron Kapllanaj, ka qenë ai që ka nisur të njëjtën “këngë”, duke deklaruar në mbledhje se rruga më e thjeshtë për të gjetur zgjidhjen në situatën ku ndodhet Partia Demokratike është që të hapet gara, ndërsa vendimi i 9 shtatorit për përjashtimin e Berishës nuk do të ndryshojë. Sipas tij, duhet të ngrihet një komision i përbashkët për të bashkuar demokratët dhe nëse kjo refuzohet nga Foltorja atëherë komisioni duhet të drejtojë Partinë Demokratike deri në zgjedhje.
“Krijojmë një komision të përbashkët për të bashkuar demokratët. Nëse Foltorja nuk pranon, komisioni drejton PD-në deri në zgjedhje. Vendimi i 9 shtatorit për Berishën nuk ndryshon. Ne duhet të gjejmë një mekanizëm për t’u bashkuar. Propozimet që ne bëjmë me ju i diskutojmë, por keni parë që nga ana tjetër të thotë dikush këto që po ju kërkojmë ne ju? Jo nuk ka, se kanë frikë të flasin kundër Sali Berishës. Vendimi i 9 shtatorit për Sali Berishën nuk mund të ndryshojë. Rruga më e thjeshtë për zgjidhjen është të hapim garën në PD. Të lëmë datën e zgjedhjeve dhe të hyjmë në zgjedhje. A na bën mirë kjo? Mendoj se jo. A i bashkon demokratët, jo, ndoshta do i dëmtojë më shumë, do çahet më shumë. Mund të ngremë një komision me 10 veta, dhe ne bëjmë një veprim për të bashkuar demokratët. 5 anëtarë nga PD dhe i lëmë afat Foltores të sjellë 5 përfaqësuesit e vet. Natyrisht pa Berishën dhe Bashën. Nëse nuk vijnë kjo strukturë të drejtojë PD për një periudhë kohe deri në procesin e ardhshëm zgjedhor” – tha Kapllanaj.
Edhe kryetari i PD-së në degën numër 8 në Tiranë, Pëllumb Seferi, mësohet të ketë deklaruar gjatë mbledhjes së Kolegjit të Kryetarëve në selinë blu se Lulzim Basha, i cili u doli i treti në zgjedhjet e pjesshme, ka mbështetjen e anëtarëve të PD-së në degën që ai drejton. Seferi ka thënë të njëjtat fjalë si para 6 Marsit ku sipas tij demokratët s’duhet të nxitojnë një zgjidhje emocionale, por të punojnë për të bashkuar Partinë Demokratike duke ngritur një komision të përbashkët pune me përfaqësi nga të dyja palët. NDërkoh fajin e humbjes së PD-së në zgjedhjet e 6 marsit ia hedh Sali Berishës dhe Ilir Metës ku sipas tij për të goditur kryedemokratin Basha.
“S’duhet te nxitojmë me zgjidhje emocionale dhe për interesa personale, por të punojmë për bashkim. Te ngremë grup negocimi me Foltoren, të marrim mendimin e anëtarësisë. Berisha e ka luftën me Amerikën, s’mund ta mbaj peng PD-në. Anëtarët e degës 8 kanë shprehur mbështetje për kryetarin Basha. 6 marsi u organizuar nga Berisha e Meta për të goditur Lulzim Bashën. Pati dhe mbështetjen e Ramës, atij i intereson një person i izoluar nga Perëndimi. Arsyeja ishte vendimi për ta pezulluar Sali Berishën nga grupi. Berisha nuk e ka luftën me PD, por me Amerikën dhe përdor emrin e Bashës për të mbrojtur veten. Duhet të qëndrojmë dhe jo të bëjmë zgjidhje emocionale. Zgjidhjet të vijnë prej nesh, ne kemi organe legjitime. Deputetët duhet të jenë të kujdesshëm. Nëse kërkojnë dorëheqjen e Bashës të venë dhe mandatin e tyre në tavolinë. Asnjë se ka fituar vetë mandatin, jemi dhe ne aksioner të mandateve të tyre. Të bashkohemi për të ngritur grupe pune nga të dy palët. Për këtë duhet të ketë vullnet nga të dy palët. Duhen njerëz me integritet. Të merren opsionet e të dy krahëve, ish drejtuesve të partisë, anëtarësisë e të gjendet zgjidhje. Por aty duhet te përvëlojë qasja jonë euroatlantike, pra nuk ka kthim pas nga vendimi i 9 shtatorit” – ka thënë Seferi.
