Gjatë peplikave në Kuvend mes kryeministrit Edi Rama dhe deputetes së PD-së Jorida Tabaku për rënien e nivelit ekonomik në vend ka pasur një keqkuptim duke sjellë një tjetër përplasje mes tij dhe deputeteve të PD-së. Kryeministri iu drejtua me fjalët: “Për sa i përket raporteve, zonjë apo zonjushë se nuk jam i qartë për statusin, të kërkoj ndjesë për këtë”. Deputetja Tabaku e ka cilësuar fyerje këtë mënyrë komunikimi duke thënë se “nuk harroj që të mendoj se çfarë diskutimi banal bëhet në këtë parlament, është e martuar apo jo. Rama është mësuar që të ofendojë femrat. Preferoj që në këtë parlament të diskutojmë idetë dhe jo të ofendojmë njëri-tjetri. Ndoshta ju jeni mësuar që të ofendoni, por ne të PD jo”. Rama e ka marrë sërish fjalën duke i kërkuar ndjesë për titullin ‘zonjushë’ dhe i kërkoi që të mos i drejtohej me ‘ti’. “Shumë e nderuar deputete, unë ju kërkova ndjesë dhe faleminderit që ma sqaruat zonja deputete. Nuk e di se në cilin libër të edukatës, ju e keni mësuar që të më drejtoheni me ti. Ne nuk njihemi. Ju me ti nuk më drejtohesh dot, dakord?”.
Më herët Rama është konfliktuar dhe me deputete të tjera. Ai e cilëson Albana Vokshin “Pamela” duke e krahasuar me aktoren Pamela Anderson.
