Kryeministri holandez: Shqipëria nuk është gati për të nisur negociatat me BE-në, Maqedonia më pranë

Një ditë pasi ministri i Jashtëm i Maqedonisë së Veriut, Nikola Dimitrov kërkoi që vendi i tij të ndahet nga Shqipëria në rrugën e integrimit, vjen edhe një reagim nga kryeministri Holandez Mark Rutte.

Rutte tha se Shqipëria nuk është gati për të nisur negociatat në këtë moment ndërsa Maqedonia e Veriut është më pranë këtij synimi.

“Nuk besojmë se Shqipëria është gati për të nisur negociatat me BE-në në këtë pikë dhe sa i përket Maqedonisë së Veriut, ata janë më pranë këtij qëllimi,” tha Rutte.

I pyetur nëse viti 2025 është një afat realist për anëtarësimin e një prej vendeve të Ballkanit Perëndimor në BE, Rutte tha se qëllimi nuk janë datat.

“Nuk kemi asgjë kundër zgjerimit, por nuk ia kam idenë. Ky nuk është qëllimi”, tha ai.